ЮМОР

ЛАДИМХАН

         Уынджы сæмбæлдтæн, раздæр иу скъолайы, иу къласы кæимæ ахуыр кодтон, фæлæ ныр горæтмæ чи афтыд, мæ хъæуккаг ахæм чызгыл.
         – Оуу, манæ ма Ладимхан! Æгас цу! – бацин кодтон чызгыл.
         – Не Ладимхан, фæлæ Ларочкæ. Мамочкæ дæр ма мæ афтæ звать кæны. Мæстæй йæм разорваться фæцæйкæнын.
         – Кæд искуыдæм тагъд кæныс, Ларочкæ…
         – Что ти! Зæгъын, в киоск схожу. Мамочкæ мын афтæ зæгъы, почтальон, мол, принесет газеты. Фæлæ уæддæр я вышла.
         – Газеттæ кæсын бирæ уарзыс, æвæццæгæн.
         – Как сказать, нал фæразын без газеты.
         – Æмæ арæхдæр цавæр газеттæ фæкæсыс?
         – Вообще журналтæ больше уважать кæнын.
         – Уæдæ «Мах дуг» дæр кæсдзынæ?
         – Цавæр дуг, говоришь?
         Мæ худæг ма тыххæй баурæдтон.
         – Æмæ чингуыты кæсын нæ уарзыс?
         – А как ж! – загъта Ларочкæ.
         – Æмæ ирон чингуытæ нæ фæкæсыс?
         – Иногда сæ по-быстрому акæсын. Цыма мæ не знаешь!
         – Уæд тынгдæр кæцы фыссæджы уацмыстæ уарзыс? Мамсыраты Дæбейы «Уæззау операци» кастæ?
         – Операци? Не! Æз медицинский чингуытæ нæ фæкæсын. Къостайы роман «Фатимæ»! Эт другой дело.
         – «Фатимæ» поэмæ у... Бакастæ йæ?
         – Не! – сонт кæл-кæл ныккодта Ларочкæ, – æз кино смотреть кодтон.
         – Кæд уырыссаг литературæ фылдæр кæсыс... Толстойы «Война и мир» бакастæ?
         – Война бакастæн, фæлæ мир не успела.
         Æз ницуал загътон, фæлæ хъуыдыты аныгъуылдтæн. Цы у цымæ йæ нысан царды? Цæмæ тырны? Цы сараздзæн хорзæй адæмæн?

Чеджемты Геормæ гæсгæ